A avaliación das habilidades socioemocionais realízase nos propios centros educativos, nos que os nenos/as, de forma individual, levan a cabo as seguintes tarefas:

• Expresión emocional a través da linguaxe natural: Preséntanse unha serie de láminas que representan distintas historias; a tarefa consiste en narrar coas súas propias palabras o que está a suceder, imaxinando un final para cada historia, como se fosen os protagonistas das mesmas.

• Recoñecemento emocional: Identificar a emoción expresada (alegría, tristeza, medo, enfado ou neutral) nunha serie de rostros presentados nunha pantalla.

• Procesamento emocional e resposta empática: Visionado pasivo dunha serie de escenas das películas O Rei León e Aladdin. Ao remate de cada escena, os participantes deben indicar como se sentiu o protagonista e como se sentiron eles mesmos. Esta tarefa compleméntase co visionado dunha serie de imaxes de contido emocional.

Con esta información esperamos avanzar no coñecemento do desenvolvemento infanto-xuvenil atendendo a un compoñente clave do mesmo, como é o desenvolvemento socioemocional, así como o seu impacto no axuste condutual, emocional e psicosocial da nosa mocidade.

Esta investigación desenvólvese en colaboración co Developmental Psychopathology Lab (https://www.dplab-ucy.com/) da Universidade de Chipre, que conta cunha ampla experiencia na avaliación do procesamento e recoñecemento das emocións en nenos/as e adolescentes. Do mesmo xeito, a avaliación da expresión emocional a través da linguaxe natural realízase en colaboración co Grupo de Tecnoloxías da Información da Universidade de Vigo.