Recentemente publicouse na revista Research on Child and Adolescent Psychopathology un estudo que aplica un enfoque de análise de redes para examinar as diferenzas de xénero nos problemas de conduta e nos trazos de dureza emocional en mostras comunitarias de Estados Unidos e España. O traballo é froito dunha colaboración internacional entre investigadores da Universidade de Pensilvania, a Universidade de Flinders, a Universidade de Pittsburgh Escola de Medicina, a Universidade Internacional de Florida e a Universidade de Santiago de Compostela (grupo UNDERISK).
O estudo combina datos do Proxecto ELISA con información procedente do estudo ABCD, un dos maiores e máis influentes estudos lonxitudinais a nivel internacional sobre o desenvolvemento infantil e adolescente. A mostra final incluíu a máis de 13.000 nenas e nenos de entre 9 e 12 anos. Observáronse patróns en gran medida similares entre países e xéneros, aínda que xurdiron algunhas diferenzas relevantes. Conxuntamente, os nenos mostraron niveis máis elevados de trazos de dureza emocional que as nenas e observouse un maior risco de problemas de conduta en nenos menores de 12 anos en comparación coas nenas de Estados Unidos. A análise de redes permitiu identificar síntomas clave e patróns de interconexión consistentes, destacando unha maior centralidade da agresión relacional en nenas e da destrución da propiedade en Estados Unidos. Estes resultados subliñan o valor da colaboración internacional para avanzar na comprensión dos problemas de conduta na infancia e na adolescencia.
